Раёсати Вазорати корҳои дохилии Тоҷикистон дар шаҳри Душанбе аз боз шудани парванда нисбат ба 16 ҷавоне, ки дар ташкили муноқишаи гурӯҳӣ муттаҳам мешуданд, хабар дод. Дар хабар аз рӯзи 18 апрел гуфта мешавад, дар миёни боздоштшудаҳо 2 хонандаи мактаб ва 6 донишҷӯи Донишгоҳи олии Тоҷикистон низ мебошанд.

Нисбати онҳо бар асоси моддаи 237 қисми 3, яъне авбошии гурӯҳӣ парвандаи ҷиноӣ боз шудааст. Ба гуфтаи манбаъ, “нисбати 15 нафар қарор дар намуди ба ҳабси пешакӣ гирифтан содир гардида, нисбати 1 нафар ноболиғ чораи пешгирӣ дар намуди забонхат дар бораи набаромадан аз ҷойи истиқомат татбиқ карда шуд”.

Ҳодисаи занозанӣ шоми 28 март миёни ду гурӯҳ ҷавонони маҳаллаҳои Гипрозем ва ноҳияи Рӯдакӣ бо истифода аз чубдасту олоти оҳанин сар зада буд. Дар пайи занозании ҷавонон нӯҳ адад мошини шахсии сокинон низ осеб дид, мегӯяд полиси Душанбе.

Қаблан, мақомот гуфта буданд, ки ду ҷавон - Шоҳрух Розиқов ва Наҷибулло Баротов “саркардаҳои авбошӣ” ва ё омилони асосии занозанӣ ҳастанд. Ду нафар баъди даъвову занозанӣ бо ҳамдигар дигар рафиқонашонро барои ниқор гирифтан аз ҳамдигар даъват мекунанд ва муддати тахминан 15 дақиқа бо ҳам занозанӣ мекунанд.

Баъди ин ҳам муноқиша поён намеёбад ва соати ҳафтуними шом, Шоҳрух Розиқов, як гурӯҳи ҷавононро барои интиқом гирифтан аз Наҷибулло Баротов ба маҳаллаи Гипрозем ва ё Шаҳраки Ҳарбиён мебарад. Ба гуфтаи мақомот, ҳамчун қасос гурӯҳи ҷавонон ойинаву шишаҳои чанд мошин аз ҷумла мошини як шаҳрванди Русияро мешикананд ва “тартиботи ҷамъиятиро 20-30 дақиқа дағалона вайрон мекунанд.

Баъди ин ҳодиса сокинони маҳалла ба Радиои Озодӣ гуфтанд, ки аз дидани ҷавонони ниқобпӯш ба изтироб афтода ва сахт тарсидаанд.

Феълан мавқеи худи ҷавонҳо ва ҳам хешовандонашон дар робита бо ин иттиҳом дар даст нест.

Артиши Исроил рӯзи 16-уми июл ба бинои Ситоди неруҳои мусаллаҳи Сурия воқеъ дар Димишқ ҳамлаи ҳавоӣ кардааст.

Ду манбаи амниятии Сурия ба хабаргузории "Ройтерс" гуфтаанд, ҳамлаи ҳавоии Исроил бинои Вазорати дифои Сурияро ҳадаф қарор додааст. Ҳанӯз ҷузъиёти бештар дар бораи ин ҳамла мунтазир нашудааст.

Бар асоси ин гузориш, атрофи дафтари президенти Сурия низ аз сӯи неруи ҳавоии Исроил бомборон шудааст.

Исроил гуфт, ки ҳадафаш аз ҳамла, ҳимоят аз ақалияти дурузҳо мебошад. Дар даргириҳо миёни дурузҳо ва неруҳои Сурия дар рӯзҳои ахир, зиёда аз 200 кас кушта шудааст.

Баъди оғози даргирӣ миёни ақалияти дурузҳо ва неруҳои Сурия дар аввали ин ҳафта, артиш ба шаҳри ас-Сувайда ворид шуд. Тибқи гузоришҳо, 15-уми июл артиши Исроил ба неруҳои ҳукуматии Сурия дар ас-Сувайда зарба задааст.

Шайх Ҳикмат ал-Хаҷри, яке аз роҳбарони ақалияти дуруз, ҳукумати Сурияро ба нақзи оташбас ва бомборон кардани шаҳр муттаҳам кард. Артиши Сурия мегӯяд, танҳо ба ҳамлаҳо посух додааст.

То замоне, ки Ғарб бо шартҳои пешниҳодкардаи Маскав барои гуфтугӯи сулҳ розӣ нашавад, Владимир Путин ҷанг дар Украинаро қатъ намекунад. Дар ин бора хабаргузории "Ройтерс" бо такя ба се манбаи наздик ба Кремл гузориш додааст.

Ба иттилои хабаргузорӣ, Путин ҳарфҳои ахири Доналд Трамп дар бораи ҷорӣ кардани таҳримҳои бештарро ҷиддӣ намегирад.

Ҳамсуҳбатони "Ройтерс" гуфтаанд, Владимир Путин бовар дорад, ки иқтисод ва артиши Русия пурқувват ҳастанд ва дар баробари маҳдудиятҳои кишварҳои Ғарбӣ муқобилият карда метавонанд.

Рӯзи 14-уми июл Доналд Трамп, президенти Амрико эълон кард, ки ба Украина силоҳҳои бештар мефиристад. Трамп ҳушдор дод, ки агар Русия давоми 50 рӯз ба сулҳ мувофиқат накунад, ҳамкорони тиҷории Маскавро таҳрим мекунад.

Се манбаи огоҳ ба "Ройтерс" гуфтаанд, Владимир Путин зери фишори Ғарб ҷангро қатъ намекунад, чун бовар дорад, ки Русия тавони муқобила бо таҳримҳои бештари Ғарбро дорад.

Дар зиндонҳои Тоҷикистон зиёда аз 15 ҳазор маҳбус адои ҷазо мекунанд. Ин омор дар гузориши ахири Ваколатдор оид ба ҳуқуқи инсон омадааст.

Омори ахир дар бораи теъдоди маҳбусон дар Тоҷикистон моҳи январи соли 2024 нашр шуда буд. Он вақт шумораи зиндониён 13,5 ҳазор кас гуфта мешуд.

Нигаронӣ аз зиёд будани маҳбусон дар зиндонҳои Тоҷикистон борҳо садо додааст. Азҷумла Ваколатдор оид ба ҳуқуқи инсон соли гузашта се зиндони вобаста ба Вазорати адлияро барои аз меъёр зиёд нигоҳ доштани маҳкумшудаҳо танқид намуд.

Департаменти давлатӣ ё Вазорати корҳои хориҷии Амрико дар моҳи апрели соли 2024 “аз ҳад зиёд будани зиндониҳоро дар маҳбасҳои Тоҷикистон” мушкили ҷиддӣ номида буд.

Бар асоси гузориши Ваколатдор оид ба ҳуқуқи инсон, соли 2024 дар маҷмуъ 15 ҳазору 600 маҳкумшуда аз ташхиси вирусии норасоии масъунияти бадан гузаронда шуданд.

Манбаъ мегӯяд, аз миёни маҳбусон 30 нафарашон гирифтори ВНМО будаанд. “Ин маҳкумшудагон то лаҳзаи ба муассисаҳои ислоҳӣ ворид шуданашон ба чунин бемориҳо гирифтор будаанд,”-омадааст дар гузориши Омбудсмен.

Мақомоти Тоҷикистон ҳар дафъа дар нишастҳои байнулмилалӣ мегӯянд, баъзе аз зиндонҳо нав ва шароити нигаҳдории маҳбусон ба талаботи байнулмилалӣ наздик шудааст.

Бар асоси омори расмӣ, дар Тоҷикистон 19 боздоштгоҳ ва зиндон мавҷуд аст.

Сафаралӣ Наҷмиддинов, собиқ вазири молияи Тоҷикистон дар синни 73-солагӣ даргузашт. Дар ин бора саҳифаи Вазорати молия дар Фейсбук хабар додааст.

Мақомот дар бораи сабаби марги Наҷмиддинов чизе нагуфтаанд.

Сафаралӣ Наҷмиддинов яке аз мансабдорони собиқадори ҳукумати Тоҷикистон буд. Ӯ солҳои 2000-2013 вазири молия ва баъди он то соли 2019 директори Оҷонсии суғуртаи иҷтимоӣ ва нафақа буд.

Номи Сафаралӣ Наҷмиддинов замони кораш дар Оҷонсии суғурта, бештар дар робита ба нафақаҳои ҳангуфт ва нафақаи муҳоҷирон расонаӣ шуда буд.

Мақомоти интизомии Ҷумҳурии Белорус як шаҳрванди Тоҷикистонро, ки ба ғоратгарӣ дар Русия муттаҳам мешавад, ба ин кишвар супурдаанд.

Шӯрои ҳамоҳангсози додситониҳои кишварҳои муштаракулманофеъ дар як баёнияи расмӣ хабар додааст, ки Зикриоллоҳ Зуҳурзодаро ба Русия супурдаанд, то барои ғорати ду нафар дар назди як маркази тиҷоратӣ дар Маскав ба ҷавобгарии ҷиноӣ кашида шавад.

Дар ин баёния омадааст, Зикриоллоҳ Зуҳурзода, ҳамроҳ бо як шарикаш ба ду нафар дарафтода "аз ҷабрдидагон 5.8 миллион рублро рабудаанд".

Ҷузъиёти дигаре дар бораи ин ҳодиса нест, вале хабаргузории давлатии ТАСС рӯзи 12-уми ноябри соли 2023 гузориш додааст, ки дар ин рӯз ду фарди ношинос ба рӯи ду нафар газ пошида, онҳоро латукӯб кардаанд, бинии якеро ҳам шикастаанд ва 5.8 миллион рубли ӯро ғорат кардаанд.

Дар хабари ТАСС омадааст, ки фарди ҷабрдида ва ғоратшуда, шаҳрванди Чин мебошад.

Доналд Трамп, раисҷумҳури Амрико мегӯяд, ки Владимир Зеленский, президенти Украина, набояд ба Маскав ҳамла кунад.

Ба гузориши хабаргузории "Рейтерз", Трамп ин изҳоротро рӯзи 15 июл пас аз он ба хабарнигорон баён кард, ки рӯзномаи "Financial Times" гузориш дод, ки раисҷумҳури Амрико Зеленскийро ба ҳамла дар умқи хоки Русия ташвиқ кардааст.

Тибқи гузориши "Financial Times", Трамп аз Зеленский пурсидааст, ки оё бо дарёфти мушакҳои дурбурд аз Амрико метавонад ба Маскав ҳамла кунад ё не?

Вақте хабарнигорон аз Трамп дар ин бора пурсиданд, ӯ посух дод, "на, Зеленский набояд ба Маскав ҳамла кунад" ва афзуд, ки раисҷумҳури Русия бояд зарфи 50 рӯз бо созиши оташбас мувофиқат кунад, дар ғайри он бо таҳримҳо рӯбарӯ хоҳад шуд.

Амрико ахиран ваъдаи кӯмакаҳои низомии нав ба Украина дод ва рӯзи 15 июл эълон шуд, ки чанд системаи мушакии "Patriot" аз Олмон ба Украина дар ҳоли интиқол аст.

Шӯрои Аврупо рӯзи 15 июл ҳашт фард ва як ниҳоди Эронро бинобар "нақзи ҳуқуқи башар" ва "саркӯбҳои фаромарзӣ", таҳрим кард.

Бар асоси баёнияи ин Шӯро, афрод ва ниҳоди таҳримшуда ба намояндагӣ аз ниҳодҳои давлатии Эрон дар хориҷ аз кшивар, дар эъдомҳо ва кушторҳои худсарона, нопадид сохтани афроде, ки мухолиф ё мунтақиди сиёсатҳои Ҷумҳурии ислом будаанд, даст доштаанд.

Ин баёния мегӯяд, ки феҳристи нав баёнгари нигарониҳои Иттиҳоди Аврупо дар бораи саркӯби фаромарзӣ аз сӯи ниҳодҳои давлатии Эрон бо истифода аз афроди гумошта, ба вижа ҷинояткорон ва шабакаҳои ҷиноии созмонёфта, аст, ки мухолифон ва ҳомиёни ҳуқуқи башар дар саросари ҷаҳон, аз ҷумла, дар қаламрави Иттиҳоди Аврупоро ҳадаф қарор медиҳад.

Шӯрои Аврупо мегӯяд, "Шабакаи Зиндаштӣ", як гурӯҳи ҷиноии вобаста ба Вазорати истихбороти Эронро дар феҳристи таҳримҳои худ қарор дод, ки аз ҷумла, террори мухолифони эронӣ ва афроди мунтақиди сиёсатҳои он кишварро анҷом додааст.

Дар ин феҳрист ҳамчунин раҳбарони чанд шабакаи қочоқи маводи мухаддир, афсарони ниҳодҳои интизомӣ ва кашфи Эрон шомил ҳастанд.

Дороиҳои ин афрод ва ниҳоди таҳримшуда дар қаламрави Иттиҳоди Аврупо боздошта мешаванд ва онҳо ҳаққи сафар ба қаламрави ин иттиҳодияро надоранд.

Дар порлумони Русия тарҳи санадеро баррасӣ мекунанд, ки зоҳиран хароҷоти муҳоҷирони корӣ, аз ҷумла муҳоҷирони тоҷик барои гирифтани патентро зиёдтар мекунад. Владимир Володин, раиси Думаи давлатӣ гуфт, ки тарҳи санади мазкур рӯзи 15-уми июл дар нишасти вакилони мардумӣ мавриди баррасӣ қарор мегирад.

Бар асоси он, муҳоҷир маҷбур мешавад, ки барои гирифтани патент ва ё иҷозаномаи кор, дароз кардани муҳлати он, гирифтани нусхаи патент ва ё ворид кардани тағйирот ба он аз 2100 то 4200 рубли иловагӣ бисупорад.

Владимир Володин афзудааст, ки тарҳи санади нав имкон медиҳад, “бар иловаи афзудани пул дар буҷаи давлат, назорати муҳоҷирон сахттар шавад, ҷойи воқеии иқомати онҳоро муайян кунанд ва дар ниҳоят муҳоҷирати ғайриқонунӣ кам шавад.”

Бар иловаи ин ҳама пешниҳод шудааст, ки ҳаҷми боҷи давлатӣ барои сабти номи хориҷиён аз ҷумла муҳоҷири корӣ дар ҷойи зист, дароз кардани мӯҳлати иқомати онҳо боло бурда шавад. Дар як соли ахир Думаи давлатии Русия на камтар аз 20 санад ва қонунеро қабул кард, ки шарту шароити зиндагиву кори муҳоҷиронро дахл дорад ва онро маҳдуд ва ё сахттар мекунад.

Ба қавли ҳомиёни ҳуқуқ, пайваста бардоштани мавзуи муҳоҷират дар Думаи давлатӣ талоше барои дур бурдани афкори умуми Русия аз мушкилоти афзояндаи дохилӣ ва бахусус ҷанги вайронгар дар Украина аст, ки ҷони сарбозони ҷавони зиёдеро мегирад. Русия бузургтарин мизбони муҳоҷирони тоҷик аст ва дар он бештар аз 1 миллион нафар аз аҳолии қобили кори кишвар кору зиндагӣ мекунанд.

Дар Қирғизистон дар давоми шаш моҳи аввали соли ҷорӣ 10 кӯдак аз бемории сурхакон ҷон додааст. Шаш кӯдак то яксола, дуи дигар як то панҷсола ва ду нафари дигар аз 8-сола боло буданд. Маркази ҷумҳуриявии иммунопрофилактикӣ гуфтааст, ҳамаи кӯдакони даргузашта аз бемории сурхча эм нашуда буданд.

Гулзода Даданова, намояндаи ин муассиса ба Радиои Азаттик гуфтааст, ки дар давоми соли ҷорӣ дар Қирғизистон 8572 ҳолати гирифторӣ бо бемории сурхча ба қайд гирифта шуда, бештарин омор дар шаҳри Бишкек сабт гардидааст. Даданова гуфтааст, ки эмкунии кӯдакон барои пешгирӣ аз сурхакон бисёр муҳим дониста мешавад.

Азаттик менависад, дар ҳудуди Иттиҳоди Шӯравӣ эмкунии кӯдакон алайҳи бемории сироятии сурхча аз соли 1963 шурӯъ шуд, вале баъди касби истиқлолият бархе волидон огоҳона аз эмкунии фарзандонашон даст мекашанд. Чунин тамоюл, ки гӯё бо андешаҳои эътиқодӣ волидон аз воксинзании фарзандонашон худдорӣ мекунанд, аз соли 2012 шурӯъ шуд, менависад расона.

Дар натиҷа таҷрибаи тақрибан ба нестӣ овардашудаи гирифтории кӯдакон ба сурхакон аз байн рафт ва дар солҳои 2014-2015 дар саросари ин ҷумҳурӣ 17 ҳазор ҳолати беморӣ сабт шуд. Баъди тадбирҳои саросарӣ ва коҳиши қобили мулоҳизаи ин беморӣ, соли 2023 эпидемияи нави сурхча сар зад.

Мақомоти беҳдошт сокинонро ташвиқ мекунанд, ки фарзандони 1 то 6-соларо ҳатман зидди сурхча эм кунанд ва эмгузаронӣ ройгон барпо мешавад.

Додгоҳи вилояти Суғд, профессор ва ректори собиқи Донишгоҳи давлатии Хуҷандро бо гуноҳи ришваситонӣ ба 7 соли зиндон маҳкум кардааст. Дар ин бора рӯзи 15-уми июл хабаргузории “Азия Плюс” гузориш дода, гуфтааст, ки устоди улуми таърих Аюб Усмонзодаи 53-сола ба гирифтани ришваи зиёд гунаҳкор дониста шудааст. Ҳукми ӯ рӯзи 26-уми июн содир шудааст. Маълум нест, профессори тоҷик аз кӣ ва чӣ қадар пора гирифтааст.

Назари вакили дифои Аюб Усмонзода маълум нест, вале дар гузашта ҳамсари ӯ ба Радиои Озодӣ гуфта буд, ки “ба шавҳараш бадӣ кардаанд” ва хонаводааш умед дорад, ки ӯро озод мекунанд. Аюб Усмонзода моҳи апрели соли 2022 бо қарори ҳукумати Тоҷикистон ва имзои раиси ҷумҳур Эмомалӣ Раҳмон ректори Донишгоҳи давлатии Хуҷанд таъйин шуд ва моҳи майи имсол ӯро аз мақомаш озод гирифтанд ва сабаби сабукдӯш карданашро ҳам нагуфтанд.

Embed ба дигарон фиристед

7 соли ҳабси Аюб Усмонзода - ректори собиқи Донишгоҳи давлатии Хуҷанд

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:01:35 0:00

Ректори собиқи яке аз донишгоҳҳои бузургтарини давлатии Тоҷикистонро моҳи марти имсол дастгир карданд ва аз он замон то кунун ҳамеша парвандаи ӯро махфӣ нигаҳ доштаанд. Аммо моҳи феврали ҳамин сол раёсати идораи мубориза бо коррупсия дар вилояти Суғд Донишгоҳи давлатии Хуҷандро муассисае номид, ки ба гуфтаи идора, ришваситониву фасод дар он авҷ гирифтааст.

Дар ин донишгоҳ ба қавли мақомот, танҳо дар соли гузашта тақрибан 50 мавриди ришвахориву пораситониро ошкор кардаанд. Аюб Усмонзода чанд вақт баъд аз боздошти Парвиз Рӯзизода, декани факултаи биология ва химияи Донишгоҳи давлатии Хуҷанд дастгир шуд. Парвиз Рӯзизода рӯзи 13-уми июни соли 2025 дар боздоштгоҳ даргузашт ва сабаби марги ӯро бемории қалб гуфтанд.

Артиши Русия шаби 15 июл шаҳри Шосткаи вилояти Сумии Украинаро мушакборон кард, дар натиҷа, бинои беморхонаи касалиҳои рӯҳӣ хароб карда шуд ва 11 бинои истиқоматии баландошёна осеб дид.

Бар асоси иттилои пешакӣ, ба шаҳри Шостка се ҳамлаи мушакӣ сурат гирифтааст. Як нафар маҷрӯҳ гардид. Дар маъмурияти низомии вилоят гуфтанд, ки “ҳаҷми хисорот дақиқ карда мешавад. Ҳоло поккории ҷои харобаҳои биноҳо идома дорад”.

Шарҳдори Шостка Николай Нога гуфт, ки дар ҳамлаи шабона диспансери бемориҳои рӯҳу асаби Свеский мавриди ҳамла қарор гирифт ва бинои он хароб карда шуд. Дар баробари 11 бинои манзилҳои бисёрошёна 10 манзили истиқоматии хусусӣ ҳам осеб дидаанд.

Олег Григоров, раҳбари маъмурияти ҳарбии вилояти Суми гуфт, ки дар ҳамлаҳои шабона духтарчаи 14-сола маҷрӯҳ шудааст. Ӯ замоне, ки ба сӯи паноҳгоҳ шитоб мекард, аз таркише захмӣ шуд.

Дар деҳаи Приколотное дар вилояти Харков, ба иттилои Хадамоти давлатии ҳолатҳои изтирорӣ, хонаҳои хусусӣ хароб карда шуда, ду манзил ва чор сохтмони хоҷагӣ ба коми оташ рафтаанд. Як зани 68-сола осеб дидааст.

Дар Думаи давлатии Русия мехоҳанд тарҳи наверо баррасӣ кунанд, ки дар сурати қабули он, муҳоҷири корӣ бояд қабл аз вуруд ба Русия, шаҳодатномаи тиббӣ дар бораи надоштани ягон вируси сирояткунанда, пешниҳод кунанд.

Аз пешниҳоди мазкур Ярослав Нилов, раиси Кумитаи кор, ҳифзи иҷтимоӣ ва собиқадорон дар телеграм канали хуб хабар додааст.

Бо пешниҳоди вай, муҳоҷири корӣ ба ғайр аз суғуртаи тиббӣ, бояд натиҷаҳои санҷишеро ҳам пешниҳод кунанд, ки дар бадани онҳо мавҷуд набудани маводи мухаддир ва психотропиро тасдиқ мекунанд.

"Хориҷиёне, ки барои пул кор кардан ба Русия меоянд, бояд мушкилоти моро ҳал кунанд, на мушкилоти худро биёранд",-таъкид кардааст ин вакил.

Ҳамчунин, бо пешниҳоди ӯ, шаҳрвандони хориҷие, ки ба Русия меоянд, бояд шаҳодатномаи мавҷуда дар бораи набудани ВИЧ, гепатити В, С, сил ва сифилис, дошта бошанд.

Бо вуҷуди тамоми маҳдудиятҳо, Русия бузургтарин мизбони муҳоҷирони корӣ аз Осиёи Марказӣ боқӣ мемонад ва бино ба оморҳо, дар он кишвар бештар аз 1 миллион нафар аз муҳоҷирони тоҷик кору иқомат мекунанд.

Дар пайи сӯхтор дар як нуқтаи фурӯши самбӯса дар шаҳри Душанбе, 4 нафар захмӣ шудаанд.

Раёсати корҳои дохилӣ дар Душанбе хабар дод, ки оташсӯзӣ нисфирӯзии рӯзи 14-уми июл дар натиҷаи таркиши зарфи гази моеъ ва аз "беэҳтиётӣ", рух додааст.

Манбаъ гуфтааст, ки ин нуқта ба Тулқин Урунбаев тааллуқ дорад ва чор кормандони захмӣ, ҳоло дар беморхона бистариянд.

Ҳамасола дар пайи сӯхторҳо дар Тоҷикистон чандин кас қурбон мешавад ва ба иқтисодиёти кишвар ҳам хисорот ворид мешавад.

Идораи Омбудсмен ва ё ваколатдори ҳуқуқи инсон дар Тоҷикистон аз марги чор кӯдаки хурдсол, ки модарашон онҳоро ба рӯдхона андохт, изҳори нигаронии амиқ карда, аз ҷомеа ва мақомот хостааст, барои муҳофизати кӯдакон тадбирҳои бештар биандешанд.

Дар баёнияи дафтари матбуоти омбудсмен дар бораи фоҷиаи моҳи гузашта дар ноҳияи Фархор, ки дар сомонаи ин ниҳод нашр шуд, омадааст, “ҳодисаи мазкур боиси нигаронии амиқи мақомоти давлатӣ ва аҳли ҷомеа гардида, чораҳои таъхирнопазирро дар самти ҳифзи ҳуқуқ ва таъмини манфиатҳои беҳтарини кӯдакон тақозо менамояд.”

Ваколатдори ҳуқуқи инсон дар Тоҷикистон гуфтааст, бо вуҷуди андешидани тадобир дар бораи ҳимояти кӯдакон “ҳолатҳои алоҳидаи фавт, зӯроварӣ ва табъиз, ки нисбати кӯдакон ба вуқӯъ меоянд, ташвишовар боқӣ мемонад.”

Дар ин баёния ҳамчунин омадааст, “таҳлилу омӯзишҳо нишон медиҳад, ки дар аксар ҳолат ҳуқуқу манфиати кӯдакон аз ҷониби падару модар, дигар парасторони онҳо ва махсусан шахсоне, ки кӯдак ба онҳо меҳр баста, боварӣ дорад вайрон карда мешавад.”

Шаби 29 ба 30-уми июн Мадина Ҳалимова, модари 27-солаи чаҳор тифли хурдсол, ки хурдӣ семоҳа ва бузургӣ 5-сола буд, чаҳор фарзанд ва худашро зоҳиран бо қасди худкушӣ ба рӯдхонаи Яхсу андохтааст.

Чаҳор фарзандаш ғарқ шуда ҷон додаанд, вале худаш зинда монд. Ӯро бо иттиҳоми қатли кӯдаконаш боздошт карданд, вале сабабҳои дақиқи қасди худкушӣ кардани зани ҷавон маълум нест. Ҷасади се тифлашро пайдо кардаанд, ҷустӯҷуи яке дигар идома дорад.

Ваколатдори ҳуқуқи инсон дар Тоҷикистон аз мақомот, падару модарон ва ҷомеа тақозо кардааст, ки барои таъмини муҳити солиму амн барои кӯдакон чора биандешанд ва барои баланд бардоштани маърифати ҳуқуқии аҳолӣ “дар самти ҳифз, тарбия, таълим, назорат ва рушди кӯдакон корҳои фаҳмондадиҳиро тақвият бахшанд.”

Пайвандони як духтари чечен, ки аз хушунати хонаводагӣ ба Гурҷистон фирор карда буд, ӯро дуздида талош карданд ба Русия баранд. Дар ин бора гуруҳи ҳомиёни ҳуқуқи "Маарем" хабар доданд.

Ба гуфтаи ҳомиёни ҳуқуқ, Лаура Авторханова рӯзи 13-уми июл ба кормандони паноҳгоҳ хабар додааст, ки наздиконаш ӯро пайдо кардаанд. Вақте кормандони паноҳгоҳ ба қаҳвахонаи таъиншуда омаданд, Авторханова ҳамроҳ бо хоҳаронаш ва панҷ чечен буд. Ин афрод Лаура Авторхановаро шиканҷа карда, баъдан бо худ бурданд.

Ба гузориши "Маарем", наздиконаш баъди дуздидани Авторханова ӯро ба шуъбаи пулис бурданд, то дар бораи ихтиёран тарк кардани Гурҷистон ариза нависад. Дертар хешовандони духтар шуъбаи пулисро тарк карданд ва баъди пурсиш, кормандони пулис Лаура Авторхановаро ба ҷойи бехатар бурданд.

Пулис таҳқиқ дорад, ки чигуна бо вуҷуди зери муҳофизат қарор доштани Лаура Авторханова, хешовандонаш ба ӯ наздик шуданд.